У Сляпянцы ўзводзяць будынак цэнтра ізаляцыі правапарушальнікаў на 230 чалавек. Плануецца, што ён пачне працаваць у пачатку 2027 года. Гэта «Люстэрка» высветліла з дадзеных дзяржзакупак. Змяшчальнасць ізалятара будзе ў два разы большая за аналагічную структуру ў сумнавядомым завулку Акрэсціна, а на яго стварэнне выдаткуюць дзясяткі мільёнаў рублёў.
На вуліцы Карвата, 74, з мінулага года ідзе рэканструкцыя будынка пад цэнтр ізаляцыі правапарушальнікаў. Апошнія гады памяшканне было закінутае, да гэтага там размяшчаліся офісы, а яшчэ раней — казарма ўжо няіснай вайсковай часткі № 40858. Працы праводзіць «Будтрэст № 1», якому за гэта плацяць з бюджэту 25,7 млн рублёў, высветліла «Люстэрка» са звестак дзяржзакупак.
Рашэнне пра будаўніцтва Мінгарвыканкам пряняў яшчэ ў 2021 годзе. Першы этап, а менавіта праектныя работы, пачаўся ў пачатку 2024 года і каштаваў 1 млн 159 тыс. рублёў. Сама рэканструкцыя мусіла стартаваць у чэрвені 2025 года, але па дакументах пачалася ў верасні.
Увесці ў эксплуатацыю ізалятар збіраюцца 9 студзеня 2027 года.
Цяпер улады шукаюць кампанію, якая арганізуе там сістэму бяспекі і відэаназірання. На гэта гатовыя выдаткаваць 4,7 млн рублёў.
Новы ЦІП будзе разлічаны на ўтрыманне 230 чалавек. Таксама ўшчыльную да яго будзе размешчаны адміністрацыйны будынак на 1 тыс. м², уезд на тэрыторыю будзе абсталяваны кантрольна-прапускным пунктам. У адміністрацыйным памяшканні прадугледжаная трэнажорка на 12 чалавек, а таксама зала рукапашнага бою.
«Тэрыторыя мусіць мець агароджу па перыметры вышынёй не менш за 3 метры, узмоцненую па версе калючым дротам на 5−7 нітак па гарызанталі», — гаворыцца ў дакументах. Уся тэрыторыя, а таксама камеры будуць абсталяваныя відэаназіраннем.
Новы ізалятар будзе ўдвая большы за дзейны на Акрэсціна
У 2020 годзе на той момант начальнік ЦІП у завулку Акрэсціна Яўген Шапецька паведамляў, што яго змяшчальнасць — 110 чалавек (супраць 230 на Карвата). Пра колькасць месцаў у размешчаным тамсама ІЧУ нічога не ўдакладнялася.
Тым часам, згодна з разлікамі «Люстэрка», у 2024 годзе для структуры закуплялі харчаванне з такім разлікам, што адначасова на Акрэсціна будзе знаходзіцца каля 342 чалавек на суткі.
Чытайце таксама
Поблагодарить за статью